Friday, April 4, 2014

သီပေါမြို့ကို အလည်တစ်ခေါက် ကိုယ်ရောက်ခဲ့တယ်…

သီပေါမြို့လေးက လှတယ်…
နံဘေးမှာ ရစ်ခွေစီးဆင်းနေတဲ့ ဒုဌ၀တီမြစ်ကို ဖြတ်ကျော်ပြီးနောက်မှာတော့ သီပေါမြို့လေးဆီ ကိုယ်တို့ ရောက်ခဲ့တယ်..
သီပေါမြို့ရဲ့ အထင်ကရ ဘုရားတွေဆီ အဖူးမြော်ရောက်ခဲ့တယ်.. ကိုးသိန်းကိုးသန်းရှင် ဆုတောင်းပြည့်ဘုရား၊ သမိုင်းဝင် ဘော်ကြိုဘုရားကြီး၊ နောက် လွယ်မုတ်တောင်မှာရှိတဲ့ စော်ဘွားကြီး ဆာစ၀်ချယ်ရဲ့ ဂူသချိုင်္င်းအပြင် ကိုရင်လေးရေတံခွန်၊ နောက် အဖ ကိုးမြို့ရှင်နဲ့ အမေ ပုလဲယဉ်မယ်တော်တို့ရဲ့ အကြီးဆုံး နတ်နန်းဆီကိုလည်း ရောက်ခဲ့တယ်..
နောက်ဆုံးအနေနဲ့ ကိုယ်တို့ ရောက်ခဲ့တဲ့ နေရာကတော့ သီပေါမြို့ရဲ့ နောက်ဆုံးစော်ဘွားမျိုးဆက် နေထိုင်ခဲ့တဲ့ သီပေါဟော်နန်းပါပဲ..
ဒီဟော်နန်းမှာ သီပေါမြို့ရဲ့ နောက်ဆုံး စော်ဘွား စ၀်ကြာဆိုင်နဲ့ ဇနီး သြစတြီးယားသူ မဟာဒေ၀ီ စ၀်သုစန္ဒီတို့ နေထိုင်ခဲ့ကြတယ်..
ဟော်နန်းက ကြီးကျယ်ခမ်းနားလှတယ်.. မိုးမှုန်မှုန်လေးတွေ တဖွဲဖွဲရွာနေတဲ့ကြားက ဟော်နန်းဆီ ရောက်ဖို့ ကိုယ်တို့တွေ ချဉ်းကပ်လာကြတဲ့အခါ ပိတ်ထားတဲ့ သံပန်းတံခါးကြီးပဲ ရှိပါတယ်.. အရင်တုန်းကဆို ဒီနေရာတ၀ိုက်ဟာ အိမ်ဝင်းထဲကို ၀င်ခွင့်မပြောနဲ့ .. ဖြတ်သန်းသွားလို့ မရခဲ့ဘူး.. အစောင့်အကြပ်တွေ အထပ်ထပ်နဲ့ စောင့်ကြည့်နေတဲ့သူတချို့ ရှိခဲ့ဖူးပါလိမ့်မယ်…
အခုတော့ ဒီနေရာမှာ ပျက်စီးယိုယွင်းမှုတွေ ရှိနေပေမဲ့ အထွတ်အမြတ် နေရာတစ်ခုကဲ့သို့ ယခုအထိ အရိုအသေပေး စောင့်ရှောက်နေတဲ့သူတွေ ရှိနေတုန်းပါပဲ။။
ဒီနေရာဟာ ဒဏ္ဍာရီပုံပြင်တွေထဲကလိုပဲ ပုံပြင်ဆန်လွန်းတယ်.. စစ်အုပ်ချုပ်ရေး လူတန်းစားတွေကြောင့်ပဲ ဒီအိမ်တော်ရဲ့ သမိုင်းဟာ ပိုပြီး ပီပြင် ထင်ရှားလာတယ်လို့ ဆိုရမလားပဲ…
အခုအခါမှာတော့ ကမ္ဘာလှည့်ခရီးသွားတွေနဲ့ ကိုယ်တို့လို ဌာနေခရီးသွားတွေ ၀င်ရောက်လည်ပတ်ခွင့် ရခဲ့.. ကြည့်ရှု လေ့လာခွင့်ရနေပြီ ဖြစ်ပါတယ်..
လိုက်ပို့ပေးတဲ့ သီပေါမြို့ခံ ဆရာမရဲ့ အဖေနဲ့အမေကတော့ ဒီနေရာဟာ မဖြစ်မနေ သွားရောက် လည်ပတ်သင့်တဲ့နေရာလို့ ပြောပြီး သူတို့ပဲ ဦးဆောင်ကာ ကိုယ်တွေကို ခေါ်လာတာ ဖြစ်တယ်..
ဧက တော်တော်များများ ကျယ်ဝန်းတဲ့ ခြံဝန်းကြီးထဲမှာ ထီးထီးကြီး ရပ်တည်နေတဲ့ ဟော်နန်းဟာ အခုအချိန်အထိတောင် ခိုင်ခိုင်မာမာ ရှိနေတုန်းပါပဲ။။
သံပန်းတံခါးမှာ သော့ခလောက်အကြီးကြီး တစ်ခု ခတ်ထားတယ်.. အတွင်းထဲကို လှမ်းအော်ခေါ်နိုင်ပေမဲ့ ဒေါ်ဒေါ်က ကားပေါ်မှာ ပါလာတဲ့ ကလေးငယ်လေးကို သံပန်းနဲ့ အုတ်တံတိုင်းကြားက နေရာလေးကနေ ကပ်ပြီး ခြံဝင်းထဲကို ၀င်ခိုင်းလိုက်ပြီး အထဲက လူတွေကို ဟော်နန်းထဲကို ၀င်ရောက်လေ့လာခွင့်ရချင်နေတဲ့ လူတွေ အိမ်ဝန်းပြင်မှာ ရပ်နေတယ်လို့ အကြောင်းကြားခိုင်းလိုက်ပါတယ်..
ခဏနေတော့ အိမ်ဝန်းထဲကနေ အမျိုးသမီးကြီးတစ်ယောက် ထွက်လာတယ်.. သူမက ရှမ်းဘာသာ စကားနဲ့ စကားလှမ်းပြောပြီးနောက်မှာမှ သော့ခလောက်ကို ဖွင့်ပေးလိုက်တယ်.. တကယ်တော့ ကျွန်မတို့ ရောက်တဲ့အချိန်ကလည်း ညနေ ၄ နာရီဝန်းကျင်လောက်ဆိုတော့ ဟော်နန်းပိတ်ချိန် ဖြစ်နေပြီ.. ဒါပေမဲ့ ဒေသခံဒေါ်ဒေါ်ရဲ့ ကောင်းမှုကြောင့် ကျွန်မတို့ ဟော်နန်းထဲ ၀င်ခွင့် ရလိုက်တယ်..
အမျိုးသမီးကြီးက ကျွန်မတို့ကို ဘယ်ကနေ လာတဲ့ ဧည့်သည်တွေလည်းလို့ မေးတယ်.. ကျွန်မတို့ရဲ့ အလုပ်အကိုင်တွေနဲ့ နေရင်းအရပ်တွေကို ပြောပြပြီးနောက်မှာတော့ ခြံဝန်းထဲကို လှည့်လည် ကြည့်ရှုပါဦးလို့ အရင် ပြောပါတယ်..
ခြံဝန်းကြီးထဲမှာ ကိုယ်ပိုင်ဘုရားရှိခိုးကျောင်းဆောင် ရှိတယ်..ပျက်စီးယိုယွင်းနေပြီး ပြင်ဆင်မွမ်းမံနေဆဲ လို့ ပြောတဲ့ ဘုရားကျောင်းဆောင် နံဘေးမှာ ရိုးရာနတ်စင်တွေကိုလည်း တွေ့ခဲ့ရတယ်..
သီပေါစော်ဘွားက သူ့ရဲ့ မဟာဒေ၀ီ သြစတြီးယားနိုင်ငံသူအတွက် ဆောက်လုပ်ပေးထားတဲ့ တင်းနစ်ကွင်း၊ ရေကူးကန်.. ဒါတွေဆီလည်း ရောက်ခဲ့တယ်.. ထိုခေတ်အခါဆီကတော့ ဒီတင်းနစ်ကွင်း တွေ၊ ရေကူးကန်တွေဟာ ခေတ်စားခဲ့မှာပါပဲ.. ဒါပေမဲ့ အခုတော့ အရာအားလုံးဟာ တိတ်ဆိတ်လို့ ခြောက်ကပ်လို့….
မိုးလေးက တဖွဲဖွဲရွာနေတုန်းဆိုတော့ ပတ်ဝန်းကျင် တစ်ခုလုံး မှိုင်းလို့ပြာလို့မှုန်လို့… ပတ်ပတ်လည် ၀န်းရံထားတဲ့ ရှမ်းတောင်တန်းတွေရဲ့ အလယ်မှာ ဟိုယခင် အခေတ်အခါက ချစ်ခြင်းမေတ္တာတစ်ခုရဲ့ ပြယုဂ်ကို ဖမ်းယူပြီး ရင်ထဲမှာ ကြည်နူးမိတယ်..
ခေတ်အခါ စည်ပင်စဉ်က ဒီနေရာဝန်းကျင်တစ်ဝိုက်မှာ ပျော်ရွှင်စွာ ကြည်နူး ပျော်မြူးနေကြမယ့် ချစ်ခင်သူတွေရှိလိမ့်မယ်ဆိုတာကို တွေးမိပြီး ကိုယ့်ရင်ဟာလည်း အတိုင်းအဆမရှိ ၀မ်းနည်းလာမိတယ်…
ဟော်နန်းထဲကို အ၀င်မှာတော့ ဓာတ်ပုံတွေ၊ အသုံးအဆောင်တွေနဲ့ စာအုပ်တွေကို အစီအရီ ခင်းကျင်းပြသထားတယ်.. ဟော်နန်းကို ထိန်းသိမ်းစောင့်ရှောက်ထားတဲ့ သီပေါစော်ဘွားအနွယ် အမျိုးသမီးကြီးက ကြီးကျယ်ခမ်းနားလှတဲ့ သီပေါဟော်နန်းအကြောင်း၊ နောက် သီပေါစော်ဘွားနဲ့ သူ့ရဲ့ မဟာဒေ၀ီ အကြောင်းတွေကို ဓာတ်ပုံတွေ စာအုပ်တွေကနေ တစ်ဆင့် ရှင်းပြနေတယ်..
သူမရဲ့ အသံက ချိုအေးတယ်.. နားထောင်ကောင်းရုံသပ်သပ်ထက် ဓာတ်ပုံတွေထဲက ရုပ်ပုံလွှာတွေကြောင့် ဒီအမှန်တရားဟာ ဒဏ္ဍာရီမဟုတ်မှန်း ပိုသိလာတဲ့အခါမှာ ကိုယ့်မျက်လုံးထဲမှာ ပုံရိပ်တွေထင်လာတယ်…
အချိန်တန်လို့ နှုတ်ဆက်ပြီး ပြန်ကြချိန်မှာတော့ ခြံဝန်းတံခါးဝမှာ ရပ်တန့်ထားခဲ့တဲ့ ကိုယ်တို့ရဲ့ ကားဆီ မှုန်ဖွဖွ ရွာသွန်းနေဆဲ မိုးစက်များအကြားမှာ လမ်းလျှောက်လာရင်း အိမ်တော်ဝင်းကြီးဆီ လည်ပြန်ငေးရီမိတဲ့အခါ မှာတော့..လက်ပြနှုတ်ဆက်နေသယောင် ဟော်နန်းကြီးဟာ ပြာမှိုင်းမှုန်ရီနေတဲ့ မိုးရေစက်များကြား ထီးထီးတည်း ကျန်ရစ်ခဲ့ ကျန်ရစ်နေဆဲ ဖြစ်ပါတယ်..
ပြည့်စုံ
(04-12-2014 < 4:12 pm)

1 comment: